يا رب انت عارف
قال الله"و اذا سألك عبادي عني فأني قريب اجيب دعوه الداع اذا دعاني " يا رب انت قريب مني , ليه انا بعيد عنك؟ يا رب انت عارف كل حاجه. و عارف اد ايه انا محتاجلك و عارف اد ايه جهلي و ضعفي بيخليني ابعد عنك و اعمل حاجات تزعلك أو معملش الحاجات اللي ترضيك أو اعملها بس مش بالطريقه اللي ترضيك. أنا عارف اد ايه ان وحش معاك. و عارف أن الحاجات و النعم اللي انت ادتهالي أكبر من اي حاجه أقدر اعملها علشانك, ليه بقي الواحد بيستسهل انه يعمل أقل حاجه و هو فاكر أنه خلاص كده عمل كل المطلوب؟ أسهل حاجه ان أنا اقول أن الشيطان هو السبب,انه هو اللي بيخليني أعمل الحاجات اللي مبتخليكش راضي عني , يا رب متخليش الشيطان يتحكم فيا كده, لأنك عارف ان الشيطان بيجيي يغري الواحد انه يعمل الحاجات اللي الواحد فعلا حاسس انه نفسه فيها, فالواحد بيضعف و يسمع كلام الشيطان, يا رب خليني اقوي من الشيطان و أقوي من نفسي -أنا مش عارف ازاي لأني طول عمري ضعيف, بس القدره و القوه كلها بأيديك يا رب انت بس تقدر تخليني أستحمل كل وسوسه الشيطان و كل الحاجات اللي بيغري الواحد بيها , لا حول و لا قوه الا بك يا رب, أنا لوحدي مقدرش اعمل حاجه وحتي كل الحاجات الكويسه اللي الواحد عايزها في الدنيا؟ أسهل حاجه ان الواحد يقول كلام كويس و يبان قدام الناس انه انسان محصلش بس يا تري الواحد بيقول الكلام ده علشان هو فعلا يقصد بيه رضا ربنا و لا علشان صورته قدام الناس. يا تري ده فعلا شرك بيك؟ ده لو فعلا كده يبقي اسوأ حاجه ممكن أكون عملتها في حياتي, أنا كل ده بفتكر اني بعمل أحسن حاجه و كده في الأخر هبقي من الناس اللي بتقول عليهم:"قل هل ننبئكم بالأخسرين , الذين ضل سعيهم في الحياه الدنيا و هم يحسبون أنهم يحسنون صنعا , اولئك الذين كفروا بأيات ربهم و لقائه فحبطت أعمالهم فلا نقيم لهم يوم القيامه وزنا" يا رب متخلينيش أبدا مع الناس دول أنا عمري ما كفرت و لا أشركت بيك , لكن مش يمكن ان الواحد مبيشكرش نعم ربنا زي ما المفروض يشكرها مش ده يبقي كفر بالنعمه, ومش لما الواحد يعمل الحاجه الغلط و هو شايل من دماغه و مبيفكرش اصلا انه هيرجع يقابل ربنا مش دة كفر بلقاء ربنا ؟ طبعا انا بقول لنفسي علشان اهون الموضوع ,بس انا مش وحش للدرجة دى _انا مش بقتل ولا باسرق ولا بعمل حاجة من الحاجات الفظيعة اللي ناس بتعملها _ انا بني ادم في حالي ومبأذيش حد فكدة خلاص المفروض ربنا مش هيعذبنى ,اكن اللي بيحصل ان كل ما الواحد بيستهون بالحاجات الللى بتغضب ربنا ويعملها كل ما في الاخر ربنا فعلا بيغضب على الواحد , يعنى قد ما ربنا كويس معابا أجي اعمل الحاجات اللي تزعلة منى كدة؟ انا فعلا كدة ما استهلش ومع كدة ربنا برضة بيغفر للواحد وبيرزقة وبيوفقة في حاجات كتير ,والواحد مستمر في انة يتجاهل شكر ربنا علي كل دة , والاكتر انة واخد الحاجات دي كلها مسلم بيها كانة واجب علي ربنا انة يعمل كدة ولو معملش كدة ازعل واتضايق واقول ربنا مش بيكرمني ."فاما الانسان اذا ما ابتلاة ربة فاكرمة ونعمة فيقول ربى اكرمن واما اذا ما ابتلاة فقدر علية رزقة فيقول ربى اهانن " يعنى في الاخر برضة الواحد ما بيفتكرش ربنا الا لما يكون محتاجة ,بتاع مصلحه يعني. أنا علطول كده و مش مكسوف من نفسي, عيب فعلا. ليه الدنيا ضلمه كده أدام الواحد و ليه الحياه صعبه؟ أنا مش عارف, و محدش عارف ليه كل حاجه بتحصل في الدنيا بتحصل كده ليه, ليه لازم فيه تعب و شقا و ظلم و تعاسه و هم و قلق و حزن و نكد و مصايب و بلاوي, ليه مفيش حد مستريح و لا راضي, ليه ربنا سايبنا في الدنيا كده في الحاله ده. ايه حكمتك يا رب في كل اللي بيحصل ده- كل واحد بيحاول يفكر و يجتهد و يفسر لكن محدش عارف حاجه , وحتي اللي بيحاول يقول ان كل الحاجات الصعبه اللي في الدنيا دي علشان خير الواحد و مصلحته بشكل ما أكيد في لحظه معينه لما يحصل له مشكله زي كده أكيد هيملي الدنيا غم و نكد, علشان الواحد مبيعرفش يتكلم عن صعوبه الحياه بالسهوله ده غير لما ميكونش حاسسها وقت لما بيحسها . ساعتها بس كل النظريات و الأفكار تختفي و يبقي الواحد حاسس انه في الفراغ كده في العدم , مفيش حواليه أي حاجه ترشده أو توجهه للطريق السليم, ساعتها بس الواحد يحس انه مش قادر يعمل حاجه و ان هو محتاج أكتر بكتير من مساعده أي شخص. أنت بس يا رب اللي عارف ايه اللي فيه الخير ليا, فيا رب نور طريقي و أهديني للحاجه اللي ترضيك و تسعدني في حياتي . يا رب أنت عارف أني مش شايف الدنيا الا بشكل ضيق أوي مفهوش غير مصلحتي , بس مش شايف أيه فعلا الحاجه اللي تقربني منك و تسعدني في النيا و الأخره. يا رب خليني أنفذ ارادتك و مشيئتك في العالم ده. يا رب انت عارف أد ايه أنا بحب الناس التانين, يا رب قدرني اني اسعدهم و اعمل لهم حاجات كويسه تخلي حياتهم أحسن علشان يشكروك و يذكروك أكتر و يطيعوك و يعملوا كل حاجه زي ما يرضيك. يا رب متخليش رضا الناس هو بس همي و لا تخليني مجرد بني أدم الناس بتبقي معجبه بيه و مبسوطه منه و لكن أكون فعلا بني أدم نافع و مفيد يفكر الناس بيك و يعمل كل حاجه في سبيلك و علشان ترضي عني, و يخلي كل الناس تعمل كل حاجه في سبيلك برضه. " ربنا لا تؤاخذنا ان نسينا أو أخطأنا ربنا و لا تحمل علينا اصرا كما حملته علي الذين من قبلنا ربنا و لا تحملنا ما لا طاقه لنا به و أعف عنا و أغفر لنا و أرحمنا أنت مولانا فأنصرنا علي القوم الكافرين" يا رب اعوذ بك من أن تكون نيتي من كتابه هذا الكلام ارضاء أحد سواك.
